Skryndu dzymtys muzejā ar izstruoduots izgleitojūšs reiks – dorba burtneica, kuru var izmontuot na viņ bārni, bet ari pīaugušī, kuri grib dažaiduot sovu muzeja apmekliejumu. Tei nav parosta dorba gruomota muzeja īpazeišonai, ar tū īspiejams nest latgalīšu volūdu i kulturu aiz muzeja sīnom. Dorba burtneica izveiduotu ar Vaļsts Kulturkapitala fonda “Latvejis viesturiskūs zemu atteisteibys programys Latgales kulturys programys 2024” finansialu atbolstu. #LatgalesKulturasProgramma #VKKF
1996. godā dybynuotais Skryndu dzymtys muzejs nas bruoļu Skryndu vuordu. Bruoļi beja leli Latgolys patrioti, kuri na viņ izgleituoja apleicejūs ar dažaidim izdavumim, bet arī izcēle Latgolys kultūrys dzeivi un atzyna kulturviesturiskū montuojumu. Kab muzeja apmekliešona byutu vīgļuoka i interesontuoka, tyka eistynuots projekts par dorba gruomotom.
Anna Lazdāne Skryndu dzymtys muzeja direktore
Struodojūt kotru dīnu ar daudzim bārnim i ari ar pīaugušajim, vysod ir dūmys, kai itū stuostu padareit interesantuoku, pīviļceiguoku. Skryndi ir gaismys nesieji, partū gribēja, kab gruomota byutu kai nalels gaismys stareņš, kas varbyut uzrunuotu bārnu na tikai ite muzejā.
Ilze Ozoliņa Skryndu dzymtys muzeja vacuoko specialiste
Antons, Kazimirs i Benedikts Skrindys ir radzamuokī bruoli, radzamuokī Latvejis i Latgalis viesturē. Taipat daleiba 1917.goda kongresā, es uzskotu, ka itys kongress, kas ari lyka pamatus i kora šyupuļi Latvejis vaļsts radeišonai.
Dorba burtneicys aizdavumi nav tikai par Skryndu dzymtys viesturi. Aizdavumi ir vārsti iz volūdys saglobuošonu, jī ir vysaida veida, pīmaram, vuordu atrašana burtu režģī , ailys pabeigšana voi ari biļžu atpazeišona. Taipoš dorba burtneicu īspiejams pajimt iz sātu i pastuoveigi veikt aizdavumus.
Ilze Ozoliņa Skryndu dzymtys muzeja vacuoko specialiste
Pīmāram, mums beja lopa “Pareizi savīnoj vuordus i biļdis”. Dūtys vysaidys biļdis ar prīkšmatim nu Skrindu dzymtys muzeja kruojuma i vuordim latgaliski. Pyrma mes runojam par tū, kas ir radzams, prūtams, pīmāram, krāsls bārnim muzejā, tys nav tikai krāsls, otkon krāslam ir sovs stuosts, tys ir grafa krāsls, kod jys vyss nūtyka muižā.
Anna Lazdāne Skryndu dzymtys muzeja direktore
Kas ite ir, navar atbiļdēt, cikom naesi bejs muzejā, partū ka ir juomeklej, juoatrūn, i juosaleidzynoj daudz kas. Bet ir ari lītys, kū var dareit sātā. Ideja ir taida, ka ja pi myusu atīt kaida bārnu grupa, mes jim paruodom, pastuostam, kas myusim ir muzejā i tod īdūdam ituos gruomotys, kurys jī var aizpiļdeit sevkurā laikā voi školā.
Pyrmuos atsauksmis par interaktivū dorba gruomotu ir pozitivys. Muzeja apmekliejuma laiks paīt namonūt, vīnu lopu var pieteit dīzgon ilgi. Bārni daudzi vaira īsaistās i pīdūmoj par atbiļžu mekliejumim.
Ilze Ozoliņa Skryndu dzymtys muzeja vacuoko specialiste
Ite, pīmāram, mums dorba gruomotā īlykts akmeņūgļu gludeklis. Bārni izreiz dūmoj interesanti – nav vodu, vīns zāns interesanti pasaceja, ka nav iudiņa. Bārni saleidzynoj sovā pruotā asūšūs prīkšmatus taidus, kaidi tī beja agruok, kai tī ir tagad, deļtuo jī analizej, kai itī prīkšmati laika gaitā ir mainejušīs.
Svareigi ir saglobuot i nūdūt latgalīšu volūdu nuokušajom paaudzem. Par vuiceibu leidzekli varātu kolpuot ari Skrindu dzymtys muzeja izstruoduoto gruomota.
Ilze Ozoliņa Skryndu dzymtys muzeja vacuoko specialiste
Nūteikti itū pīzeimu gruomotu varātu izmontuot kai vīnu nu elementim nūvodvuiceibā. Ite ari taidi aizdavumi, tī poši “savieno biļdi ar vuordu” ari tod, kod nabeji muzejā, vari īpazeit, kaidi prīkšmati ir Skryndu dzymtys muzeja kruojumā i paraleli ari īsavuiceit latgalīšu vuordus.
Dorba gruomotys tiraža ir 800 eksemplari. Tū sajims kotra klase voi grupa, kas apmeklēs muzeju.