Raidejuma “Latgolys susātivs” 3. raidejuma tema ir medejprateiba Latgolā. Gastejom pīrubežā cīmā Osyunā, kas atsarūn Kruoslovys nūvodā. Tī, kūpā ar “Latgolys kulturys bīdreibys” puorstuovu organizeitū projektu “Pastuosti maņ…” , raudzejom izzynuot vītejūs cylvāku medeju lītuošonys paradumus i medejprateibys prasmis. Kai izaruodeja, tī jiutama lela boltkrīvu medeju ītekme. Kab izprostu medejprateibys situaceju plotuokā mārūgā, runuojom ar SEPLP eksperti, Rēzeknis Tehnologeju akademejis vodūšū pietneicy Sandru Sprudzāni, taipoš ari īpazynom jaunuokūs NEPLP pietejuma datus par Latvejis dzeivuotuoju medejprateibys leimini. Īgiuti daudzi byutiski sacynuojumi, pīmāram, Latvejā cylvākim ir dīzgona zama uzticeiba medejim i izpratne par medeju dorbu.
“Latgolys susātivs” ir jauns, pietnīcysks treis raidejumu cykls latgalīšu volūdā par treis aktualim problemvaicuojumim Latgolā – kultura mozuos apleicīnēs, latgalīšu volūda školuos i medejprateibys izaicynuojumi. Kotram nu vaicojumu byus veļteits vīns raidejums, kurā tiks pieteita situaceja, īpazeistūt reālys pīredzis i diskutejūt kai ar vītejim cylvākim, tai ar nūzaru ekspertim Reigā i regionā. Projektu finansej Medeju atbolsta fonds nu Latvejis vaļsts budžeta leidzeklim. #SIF_MAF2024
