Jaunīšu seminaram “Atzolys” aba tulkuojumā nu latgalīšu volūdys “jaunī osni” itūgod aprit 20 gods. Niu vaira nakai 20 jaunīšu īsaroduš Dagdā, kur daudzveideigūs i naformalūs veidūs byus vareiba dorbuotīs latgaliskā vidē, īsavuicei raksteit latgaliski i īpazeit regiona atpazeistamuokūs personeibu pīredzi i meistareibu. Itūreiz seminara dalinīki plošai puorstuov teju vysu Latgolys regionu, taipoš ir interesenti nu Reigys, pat nu Līpuojis. Nūmetnis nūrisei sajimts Vaļsts kulturkapitala fonda mierķprogramys “Latviešu vēsturisko zemju attīstības programma” i bīdreibys “Latgales reģiona attīstības aģentūra” atbolsts. #LatgalesKulturasProgramma #VKKF
Ar rodūšom, izzynūšom i pīsuotynuotom aktivitatem jaunīši nu vysys Latgolys i na tik pīsadola seminarā “Atzolys”. Profesionalu lektoru pavadeibā jaunīši vuicās latgalīšu rokstu volūdu, izzynoj regiona kulturviesturi i īpazeist myusdīnu Latgolys personeibys, procesus i Dagdys apleicīni.
Edeite Laime Latgalīšu kulturys kusteibys “Volūda” vadeituoja
Kai mes geografiski atsarūnom Dagdā, ari saīs vaira izzynuot Dīnavydlatgolys vierteibys, lītys. Vakardiņ, pīmāram, cyluojom Dagdys leigovys pyura skreini vysi kūpā.
Sonora Logina Seminara “Atzolys” dalineica
Cīši pateikami byut jaunā vītā, Dagdā, i kūpumā īpazeit kulturu. Vajag sasalaseit jaunīšim, kas grib byut aktivi. Vysi runoj, ka Latgolā ir naaktivuoki jaunīši ci cylvāki. Es dūmoju, mes pīruodam taišni pretejū.
Četru dīnu laikā jaunīšim byus vareiba sasatik ar atpazeistamom Latgolys personeibom kai Raimonds Platacis, improvizators Kozmens aba Mārtiņš Kozlovskis, raidīroksta “Pīci breinumi” komandu i cytim, kab vaira izzynuot latgalīšu volūdu dorbā iz skotivis, marketingā, digitalajuos tehnologejuos i informativajā vidī.
Raimonds Platacis Uzjiemiejs, zeimyna “Latgalactica” radeituojs
Es gribu īvuiceit radūšuos dūmuošonys tehnikys, kaidys es pats lītoju i kas jim, kai jaunim, radūšim cylvākim, nūderēs niu voi vāluok dzeivī. Tys ir, kai izdūmuot jaunys lītys. Konkreti struoduosim ar jauna zeimyna izstruodi. Jaunīšim Latgolā pateik identificētīs ar latgaliskū, partū ir cīši labi, ka tei ir kai taida kūpīna, kas pasoka, ka tys, kai tu dūmoj, ir pareizi i dūmoj vaira!
Juoņs Krūņs akters
Mes izguojom cauri elpuošonai, skaniešonai, dikcijai, bet taidā super uotrā, saspīstā tempā Tei ir vairuok taida instrumentu īdūšona tuoļuokai dzeivei. Ik pa laikam, ka maņ vajag, es varu teikt – nui, es varu latgaliski runuot, es varu laseit. Paruoduos vaira pīduovuojumu, kas nabyutu īspiejami, ka maņ nabyutu latgalīšu volūdys.
Edeite Laime Latgalīšu kulturys kusteibys “Volūda” vadeituoja
Tod šūgod raugom pīvierst viereibu, kas ir myusu vysu ituo laika aktualais vaicuojums par dezinformaceju, byušonu informātim, spiešonu struoduot ar informaceju i, prūtams, ari tys, kas arviņ vaira i vaira skar latgalīšu volūdu – digitaluos tehnologejis. Deļtuo jaunīšim pošim byus aizdavums īrunuot kaidu teikumu bolsu tolkā, raudzeit paleidzeit google’i uzlobuot latgalīšu volūdys prasmis.
Itūgod seminarā pīsadola vaira nakai 20 jaunīšu nu teju vysa Latgolys regiona, taipoš ari nu Reigys i tuoļuokais dalinīks īsarods pat nu Līpuojis. Daudzi vareibu pīsadaleit seminarā izmontoj jau ūtru reizi. Ari nūrisis vīta – Dagda – nav izavālāta najaušom.
Sonora Logina Seminara “Atzolys” dalineica
Nūteikti īgivums ir jauni draugi, jo tādiņ maņ ir draugi, ar kurim es runoju tikai latgaliski. Nu “Atzolom” es puorguoju iz “LTG tu dū!”, kas nabeja gluži jaunīšu seminars, bet ari taida kai nūmetne, kur mes vysi kūpā gondreiž goda garumā dorbojāmis. Niu jau dzīdoju folklorys kūpā “Ceidari”, kas ari ir zem “Volūdys”. Taida nūkļuošona latgaliskuokā vīdī.
Jurģis Vīdners Seminara “Atzolys” dalinīks nu Līpuojis
Mani mamma pieteica, bet es galīgi neatsakos no šādas iespējas, jo tas ir pilnīgi kaut kas cits, nekā atrasties Liepājā. Gan kā cilvēki runā, ēdiens, mūzika, visa apkārtējā vide. Kaut kā jau “Vasals!” es māku pateikt. Es teiktu, ka ir ļoti līdzīgi. Ir pāris vārdi, ko nevar saprast, bet tekstam būtību tu saproti, ko tev mēģina pastāstīt.
Edeite Laime Latgalīšu kulturys kusteibys “Volūda” vadeituoja
Paguojušā godā reikuots seminars jaunīšim. Tod beja atbraucs vīns jaunīts nu Dagdys i soka, ka Dagdā vyss ar latgaliskū jaunīšu vydā ir pašvaki. Mes tū dzierdiejom i sapuļcē, idejuos, kū tod varātu reikuot, atguoduojom, ka Linards saceja, ka vajag koč kū vaira Dagdā. Mes brauksim iz Dagdu!
Seminara “Atzolys” nūtikšonai latgalīšu kulturys kusteiba “Volūda” īgiva finansejumu 3000 eiro apmārā nu Latgolys kulturys programys,
Edeite Laime Latgalīšu kulturys kusteibys “Volūda” vadeituoja
Mes asam cīši prīceigi, ka Latgolys kulturys programa ir tei, kas turpynoj atbaļsteit jaunīšu seminaru “Atzolys” nūtikšonu. Ka mes īsaguļdeisim, struoduosim ar jaunīšim, tod ari volūda ci cytys lītys, kas Latgolā ir svareigys, byus.
Pyrmū reizi seminars “Atzolys” nūtyka 2004. godā i bejs kai nūzeimeigs atspierīna punkts jaunom personeibom Latgalīšu kulturvidī. Nūmetne nūteik ik piec diveju godu i tamā var pīsadaleit sevkurs jaunīts vacumā nu 16 da 21 godam.
