Itymā godā literari muzykaluo Andrejdīna svietej 25 godu jubileji. Pasuocīņs nūtyka gon kluotīnē Lūznovys muižā, gon attuolynuotā formatā. Literarajā kabarē izspieļuota “Uoksta capure”, izskaneja muzykali pyrmatskaņuojumi, taipoš prezentieta rakstnīka Oskara Seiksta jaunuo gruomota “Atīsmis”. Gruomotys drukuošona i ziņu sižeta izveide realizeita ar Vaļsts kulturkapitala fonda mierkprogramys “Latviešu vēsturisko zemju attīstības programma” finanisalu atbolstu. #Latgales_kulturas_programma
Svietejūt 25. Andrejdīnys svineibu tradicejis godadīnu, Lūznovys muižā puļcejūtīs kluotīnī, gon ari attuolynuoti nu Daugpiļs, Reigys, Turcejis i Pūlejis kūpā saguo literati, muokslinīki, muzyki i cyti interesenti. Kotru reizi pasuocīņa formats atsašķir i itymā godā tys papyldynuots ar pusaudžu nūmetnis “Sūpluok” dzymtu stuostu izstuodis nūslāgumu.
Ilga Šuplinska LKB vadeituoja, literaturzynuotneica
Itymā reizē cīši gribejuos, ka tys, kas ir nūtics ari nūmetnī “Sūpluok” teik sasaisteits ar Andrejim, partū ka, lai dzeivuotu Andreju tradiceja ir vajadzeigi voi nu studenti voi nu školāni. Tradiceja beja dzeiva tik ilgi, cikom Rēzeknis Augstškolā beja filologejis studenti. Itymā godā myusim beja nūmetne “Sūpluok” mes jimā taisjom dzymtu stuostu izstuodi i maņ gribejuos, ka tī školāni ari īrauga, kas ir Andrejdīnys.
Sovpus kai centraluo nūtikšona beja rakstnīka Oskara Seiksta gruomotys “Atīsmis” prezentaceja, vareiba sasatikt ar pošu autoru, kai ari sarunys ap i par volūdu, atziņom dzejūļūs.
Oskars Seiksts rakstnīks
Ka kuram naviņ cytam bez manis jī ir pasaruodiejuši byutiski voi svareigi voi cytim paruodeit vārti, tod paļdis Ilgai Šuplinskai, ituos gruomotys krystamuotei. Vysod ir golvonī cylvaki, sabīdriskī cylvāki i goduos pa kaidam marginaļam. Tod es asu taids molys cylvāks, kurs jiutās kai dīnys gaismā izvylkts.
Rakstnīks izsver, ka gruomotu jam paleidzeja izdūt cylvāki, kas ir kai sova veida “gluobšonys salenis” i kotrs sovys nūzaris eksperts. Ari litraturzynuotneica Ilga Šuplinska apstyprynoj, ka vysa pamatā ir komandys dorbs.
Ilga Šuplinska LKB vadeituoja, literaturzynuotneica
Tys ir juo tyvuokais draugs i literats, ar kū jis kūpā ir debitiejs, Valentins Lukaševičs, tys ir Ingars Gusāns (Sovvaļnīks), kam ari teik vysu laiku Oskara eiszinis, kas ari principā ir juo rodūšuma olūts. Tei ir ari Evika, kas ir ilustriejusi Oskara kruojumu. Prūtams, myusim bejuši vairuoki konsultanti, kas paleidziejuši saprast atsevišķu vuordu nūzeimi.
Valentīns Lukaševičs rakstnīks
Tī dzejūli ir originali. Jūs vareitu nūsaukt cytā žanrā. Tī ir “seikstismi”, “seikstismi” taidi, kaidim “seikstismim” ir juobyut. Ka jius skaitot Oskara Seiksta dzeju, var raiseitīs dažaidys asociacejis: kaids tī īraudzeis latvīšu tautysdzīšmu stilistiku, eisumu, koč kaidus aizjāmumus, cyts tī īraudzeis japuoņu haikys voi tankys.
Prezentacejī izskaneja ari dzīšmu ar Oskara Seiksta vuordim pyrmatskaņuojumi.
Literarajā kabarē izspieļuota “Uoksta capure”. Desmit dalinīku vydā izcalta Marijis Dzeislys, Annys Siminys i Meldrys Gailānis dzeja. Meldyrs meita Irbe sajēme ari simpateju bolvu i ari pošys autoris lasiejumūs izskaneja sarunys ar bārnim.
Meldra Gailāne rakstneica
– NĒ. Man ir bail, ka Tevi var nogalināt. – JĀ. Varbūt tas būs piedzīvojums kā datorspēlē. Es taču tur ļoti labi protu šaut un nogalināt ienaidnieku. – Tev vēl par laimi nav 18 un līdz 18 par Tevi atbildīga esmu es, tāpēc NĒ. Kādus iebildumus es atradīšu nākamajā gadā, kad viņam būs 18?
Atasgrīžūt pi rakstnīka Oskara Seiksta daiļradis juoizsver, ka gruomotā apkūpuoti pādejūs godūs topušī dzejūli, gon ari senejuoki juo pietiejumi par polonismim i jaunvuordim.
Oskars Seiksts rakstnīks
Kaidu godu piec ite raksteituo suocēs Ukraina, veļ pyrma tuo kaidu laiku suocēs covid. Es nazynu, ar kaidom sajiutom, pīmāram, dzeivuo cylvāki 1939. godā voi 1914. godā, kod Tu jiuti, ka kaut kas nav tai kai vajag. Nav labi. Man cīši grybātūs, ka tuos nav myusu atīsmis.
Ilga Šuplinska LKB vadeituoja, literaturzynuotneica
Atīsme ir vuords, kas 90. godūs izskaneja, bet nanūzastyprynuo taidā plošuokā apritī, bet nuokūtne ir tei pyrmuo nūzeime, kas ir itymā vuordā īlykta – atīt, taitod tys, kas atīs kaut kurā breidī. Tuos ir atkluosmis, partū ka nuokūtne jau vysod ir saisteita ar kaut kaidu vīziju, ar kaut kaidom gaidom.
Oskars Seiksts rakstnīks
Tu iz taida moza plūsta i upe Tevi nas. A prīškā ir krācis, iudiņa krytums i tys kū mes pat navarom īsadūmuot. Itei gruomateņa ir taida… na jau globšonuos rinčs, bet taida zeime apmāram, ka … “giunit”!
Ka byus interese, bibliotekys i školys gruomotu varēs sajimt duovynuojumā nu Latgalīšu kulturys bīdreibys. Projektu “Atīsmis – Oskara Seiksta dzejā, sarunuos, latgalīšu i pūļu volūdā” 2000 eiro apmārā atbaļsteja Latgolys kulturys programa. Sovpus pazasokūt cytim interesentim gruomotai izveiduots vizuals nūformiejums, gon ari īraksteitys četrys video sarunys ar pošu autoru.
