“Čipierkstneits” – jauna golda spiele Latgolā

Autors: Ausma Sprukte-Kozule - 15 decembra, 2022 🕙 Lasīšanas ilgums: 4 min.

Čipierkstneits ir seneja miervīneiba, kas roksturoj taidu svoru voi daudzumu, kas ir četrūs rūkys pierstūs pajemams. Niu tys ir ari jaunys latgalīšu golda spielis nūsaukums. Pīsadaleit spielī var sevkura vacuma cylvāks, partū ka jai ir vairuokys gryuteibu pakuopis. Golvonīs mierkis: kab saime, draugi, rodi voi kolēgi bīžuok kasdīnā izmontuotu i vuiceitūs latgalīšu volūdu, kai ari puorzynuotu Latgolys vierteibys. Jolanta Keiša nu Škilbanim spieli izveiduo ar Vaļsts kuļturkapitala fonda i a/s “Latvijas valsts meži” Latgolys kuļturys programmys 2022 atbolstu . #LKP_2022

Ituos i daudzys cytys viertebys niu var izzynuot jaunītis Jolantys Keišys veiduotajā spielī “Čipierkstneits”. Tys ir dorbs, kurā jai isadevs salikt sūpluok vyss sovys zynuošonys filologejī i prasmis dizainā, kab radeitu piļneigi jaunu golda spieli latgalīšu volūdā.

Jolanta Keiša golda spielis “Čipierkstneits” autore

Spielis golvonīs nūteikums ir lasēt tekstus tīši latgaliski, i skali lasēt itūs tekstus. Lai īnastu taišni jaunīšu sazinī, vidī, lai itei byutu taida normala paruodeiba i ari vacuoki, kod runoj ar sovim bārnim, lai jī nasabeist i nasakautrej ruodeit latgalīšu volūdu. Tys ir ari vyslobuokīs veids, kai īsavuiceit volūdu, kod tu losi volūdu, tod tu īsavuicīs rakstēt, kod tu dzierdi volūdu, tod tu īsavuicīs runuot.

Vuordu “čipierkstneits”, kas apzeimoj četrūs pierstūs panamamu svora i daudzuma miervīneibu Jolanta aizgiva nu sova nūvodnīka Zīmeļlatgolā, rakstnīka i bārnu dzejūļu autora Ontona Slišāna daiļradis.

Jolanta Keiša golda spielis “Čipierkstneits” autore

Tys muns devums Latgolai, itei spiele ari taids kai čipierkstneits – četrūs pierstūs panamams lelums. Gabaleņš Latgolys i mes itū spielis kauleni varam pajimt četrūs pierstūs, sovā čipierkstneitī i izsūļuot cauri, pajimt sovus gabaleņus nu Latgolys, īgiut zynuošonys. Jaunīšim, bārnim… Ej tu ituos gruomotys i losi! Spiele, monupruot, tys ir taids lobuokīs veids, kod caur naformalu taidu atmosferu tu vari vuiceitīs, i tys ir dabisks veids, kurā tu reali ari runoj i lītoj latgalīšu volūdu.

Jolanta Keiša ir nu Škilbanim i golda spielei vysu radeja poša – īzdūmuo ideji, gon izveiduo dizainu i raksteja tekstus latgliski i latviski. Jūs palobuot jai paleidzeja Edīte Husare nu latgalīšu kuļturys kusteibys “Volūda”. Nūteikumi ir vīnkuorši, leidzeigi ari cytom jau vysim ploši zynomom spielem i kūpā spieļuot var kai saimī, tai leluokā vysaiduoku vacumu kompanejī.

Jolanta Keiša golda spielis “Čipierkstneits” autore

Pats vīgluokīs ir leidzeigi teišom kai “Riču Raču” voi “Cirkā”, ka vīnkuorši met itū kauleņu i tod ej iz prīšku tik cik izkreit, i ir vīneigīs taids paviersīņs, ka pi kaut kaidim punktim kaids nūteikums spielē pasamainuos. Ir juoizlosa teksts pi konkretuo cipara, kurš ir izcalts i tūlaik tī pasoka, kū tev ir juodora: voi tev juoizlaiž guojīņs, voi tev juopaīt iz prīšku, voi tev juopaīt atpakaļ. 02:43

Taipoš spielei ir ari sarežgeituoks variants, kur jau nūderēs veiksmis faktors i spieļuot var ari, pīmāram, tikai pusaudži voi pīaugušī.

Jolanta Keiša golda spielis “Čipierkstneits” autore

Taids nūpītnuoks jau ir, kur spieles gaitu voda i ītekmej spieles karteitis, ka tu naizmontoj spieles procesā matamū kauleņu gondreiž, ar puors izjāmumim, bet ir karteites i tī ir vaicuojumu kartis i uzdevumu kartis, izaicynuojumi i draudi, vys kaut kas, kas ītekmej spieles gaitu. Nav juobyut eruditam, kaut cik zynūšam par Latgolu, pītiks jau ari ar tū, ka tu esi gona taids atvērts i gotovs izdareit kaut kaidus uzdevumus.

Latgalīšu golda spielis “Čipierkstneits” izveidei bīdreiba “Upītes jauniešu folkloras kopa” sajēme 3200 eiro lelu atbolstu nu Latgolys kuļturys programmys 2022.

Jolanta Keiša golda spielis “Čipierkstneits” autore

Paleidz eistynuot taidus sapņus, kurus, līkuos, ka sovaižuok ir pavysam gryušai koč kai eistynuot, kod tev kai jaunam cylvākam varbyut nav nimoz nikaida kapitala, lai koč kū taidu izdareitu, izvierzeitu, lai ari tev ir idejas vysaiduokys. Ūtrkuort, tys ari paleidz Latgolys kuļturys saglobuošonā, ruodeišonā, stuosteišonā i īmyužynuošonā nuokušuom paaudzem.

Taustamā formatā golda spiele “Čipierkstneits” vysdreizuok byus daeimama nuokušuo goda suokumā, taipoš sevkurs plošuoku informaceji par jū var meklēt Instagram kontā ar taišņi taidu pošu nūsaukumu.

Dalies:

Indrā vuicuos aust celainis

Runoj Latgola: 3. raidiejums par Latgolys kuļturys programmu 2022

Līdzīgi raksti