Pusaudžu dīnnakts nūmetne “Sūpluok” Latgolā puļcej pusaudžus nu vyss Latvejis jau trešū reizi. Nedelis garumā Rēzeknis nūvoda Rogovkā nūteik teoretiskys, rodūšys i praktiskys nūdarbeibys, kuru laikā pusaudži īsapazeit ar sovu identitati, latgalīšu volūdu, kulturu i tradicejom. Itymā godā Latvejis bārnim i školuotuojim pīsavīnuojušs daleibnīki ari nu Ukrainys. Nūmetnis nūtikšonai giuts finanisals atbolsts Vaļsts kulturkapitala fonda i a/s “Latvijas valsts meži” Latgolys kulturys programmā. #LKP_2022
Nu rodūšom i praktiskom nūdarbeibom, leidz īsapazeišonai ar tekstim i vuordim latgaliski i pat aktivitatem sportā, teatrī i dančūs – icik daudzveideiga programma itymā godā ir pusaudžu dīnnakts nūmetnei “Sūpluok”. Nūmtne nūteik jau trešū reizi i jau tradicionali – Rēzeknis nūvoda Rogovkā.
Ilga Šuplinska pusaudžu nūmetnis “Sūpluok” organizatore
Pymrkuort, tys ir rodūšums i paruodeit, ka ir lītys i procesi, i cylvāki apleik, kas var īraudzeit pasauli sovaižuok, nakai tys varbyut pasaruoda tikai munā saimī, tikai munā školā voi tikai munā pasaulis redzīnī un ūtrs – tū vysu dareit ar dažaidom volūdom.
Nūmetnis daleibnīku skaits ir 32 pusaudži vacumā nu 12 da 16 godu i jī sabraukušs nu vyss Latvejis, pīmāram, Reigys, Limbažim, Preilim i cytom vītom. Itymā godā pīsavīnuojušs gosti ari nu Ukrainys.
Igors Oļiševskis nūmetnis daleibnīks nu Kijivys Ukrainā
Mani sauc Igors. Maņ ir 15 godi i es asmu nu Kijivys Ukrainā. Ite atsateista cylvāka raksturs i tu vīnkuorši kliusti rodūšuoks, ir komandys dorbs i spielis. Maņ cīši pateik poši latgalīši, partū ka … es nazynu… varbyut veļ par moz ite padzeivuoju, bet maņ isaver, ka jius esit atvārtuoki, jautri, lobā nūzeimī ari skali i jiusim cīši pateik izklaidis, ir vysu laiku vajadzeiga taida kai aktiva kusteiba. Latvīši ir mīreiguoki, a latgalīši pat tai kai vairuok ukrainim leidzeigi.
Jūlija Odincova ukrainīte, nūmetnis daleibneica nu Reigys
Es nekad nedomāju, ka šī tauta, ja to tā var saukt, vai kultūra tik ļoti atšķiras no latviešiem un viņi ir ļoti līdzīgi ukraiņiem. Es tagad dzīvoju Rīgā, bet es esmu no Ukrainas, no pilsētas Sumi un dzīvoju Latvijā diezgan daudz jau, tāpēc arī saprotu latviešu valodu, bet neaizmirstu ukraiņu. Mums vajag vienu dienu tulkot, otrā dienā žurnālisti mēs esam un tā tālāk un mēs vācam informāciju no dienas un pēc tam rakstām to avīzē. Un arī blogeri.
Oksana Fartušna socialuo pedagoge nu Ukrainys
Mani sauc Oksana Fartušna. Es asmu nu Ukrainys i niu atsarūnu Latvejī Tei myusim ir vasala jauna pasaule īsapazeit ar kuļturu, tradicejom, latgalīšu volūdu. Mes kūpā ar bārnim vuicamīs dzīsmis i dzejūļus i, prūtams, ka myusus cīši puorsteidze danču vokors.
Koč ari ukraiņi izsver, ka Latvejī uzimti sirsneigi, jī cīši cer i gaida tū šalti, kod beidzūt varēs otkol byut sātā.
Oksana Fartušna socialuo pedagoge nu Ukrainys
Myusim ari ir regioni, kur ir sovys izlūksnis. Pīmāram, vīta aiz Karpatim, kur tyvai rūbežai ar Rumaneji lītoj vysaiduokus vuordus, kurus mes pat esūt ukraiņi – nasaprūtam. Dzeivī myusim ir taids moto, ka vajag vuiceitīs, atsateisteit, uzzynuot kaut kū jaunu. Itymā šaļtī mes gon, prūtams, ite puordzeivojam tūs laikus, kas Ukrainā nūteik, dūmuos esom kūpā ar sovu dzimtini i radinīkim, kuri tī palikuši. Prūtams, ka gribom braukt atpakaļ iz sātu.
Igors Oļiševskis nūmetnis daleibnīks nu Kijivys Ukrainā
Es skumstu cīši. Prūtams ari, partū ka asmu sporists. Asmu paukuotuojs i tys vyss ir acastuojs. Cīši gribīs atsagrīzt i sasnīgt augstuokus mierķus, kliut par zvaigzni, bet pagaidom mekleju jaunus ceļus, golvu nanūkoru i, kod vyss daudz moz nūsamīreis, es izreiz ar pyrmū reisu iz sātu braukšu.
Ilga Šuplinska pusaudžu nūmetnis “Sūpluok” organizatore
Mes, pyrmkuort, nūviertejom tuos vierteibys, kas myusim ir itymā breidī. Ūtromkuortuom, man līkuos, ka jī īgust taidu kai mīru, drauga placu, juosaka, ka ari puorlīceibu par tū, ka vyss byus labi.
Kotru dīnu pusaudži apmeklej sešys dažaidys nūdarbeibys i vuicās vaira gon par sovu vizualū tālu, izzynoj identitatis i volūdu vaicuojumus, meklej sovus talantus i tuoļuokuos dzeivis aicynuojumus. Kuplai ir puorstuoveita ari vītejuo kūpīna.
Mareks Gusāns nūmetnis daleibnīks nu Rogovkys
Ja kaut kū sātā aizmiersti, vari iz sātu aizīt, bet pamatā jū tyvuok dzeivoj, jū vaira aizmiersti i dīzgon bīži saīt aizīt iz sātu, pajimt kaut kū, kū esi aizmierss. Es asmu bejs ari pyrmajuos divuos īprīkšejuos, kas beja, nūmetnēs, es varātu taids veterans skaiteitīs. Pyrmīs īspaids: nabeju puorlīcynuots, voi byus tik supereigi kai paguojšajā godā, deļtuo ka tod beja vaira munu vīnaudžu, šūgod ir drusku mozuoki bārni i es dūmuoju nu… byus kai byus, bet nā – vyss pagaidom ir super.
Ilga Šuplinska pusaudžu nūmetnis “Sūpluok” organizatore
Kai mes smejamīs: pyrmajā dīnā mes na gluži guozem pūdus, bet taisejom pūdus, bet burtiski i tīšā nūzeimī raudzejom puču pūdus sataiseit nu cementa. Mes paraudzejom re kur jaunu tehniku ari kraklu apgleznuošonā i myusim vysim ir balynuotī krakli. Daudzim jau ir aprūcis, daudzim jau ir koklarūtys, daudzim byus žonglejamuos bumbenis. Mes raugam ari dzeivuot dažaidūs tekstūs. Pīmāram, ari munā nūdarbeibā mes veidojam ari avīzi, bet veidojam caur dažaidim žanrim. Pyrmuo myusim beja caur CV, ūtrei myusim ir caur anekdoti, trešuo myusim byus caur dzīsmi.
Marija Kozirkova nūmetnis daleibneica nu Veremu pogosta
Latgalīšu volūdā es runoju tikai ar tāvu, vacvacuokim ari nadaudz. A tai… ar vīnaudžim es ite pyrmū reizi suoku tai latgalīšu volūdā runuot. Kaut kai tagad myusu dīnuos jaunīši baidās vīns ar ūtru suokt latgalīšu volūdā runuot i tod ite beja īspieja suokt runuot. Ja gribat sev labi pavadeitu breivlaiku, nuocit iz šejīni!
Mareks Gusāns nūmetnis daleibnīks nu Rogovkys
Lai jī atteisteitu sovu latgalīšu volūdu, īpazeitu jaunus draugus, giutu pīredzi nūmetnēs, izbaudeitu nakts dzeivis nūmetnēs: kai tys ir, ka tu apzeimoj cytus i ka tevi apzeimoj.
Latgalīšu kulturys bīdreiba itymā godā nūmetnei sajāma atbolstu 3000 eiro apmārā nu “Latgolys Kulturys programmys 2022”.
Ilga Šuplinska pusaudžu nūmetnis “Sūpluok” organizatore
Prūtams, ka sevkurs atbolsts un myusim itymā reizē ir “Latgolys kulturys programmys” atbolsts i Rēzeknis nūvoda atbolsts un kotra vacuoka atbolsts, kas ite ir īsasaistiejīs, tys ir nanūviertejami, partū ka skaidrs, ja nabyutu taida atbolsta, Latgolā daudzi cylvāki navarātu atsaļaut itū nūmetni i absoluti breivpruoteigi pat, ja byutu gotovi struoduot školuotuoji, mes naspētu nūdrūšynuot ni dzeivuošonu, ni ēdynuošonu, ni ari tik daudz rodūšuos nūdarbeibys.
Nūmetnis organizatori planavoj ari cytus godus raksteit jaunus projektus, kab pusaudžu dīnnakts nūmetne “Sūpluok” turpynuotūs. A itymā nedeļgolā pusaudžim pīsavīnuos ari jūs saimis, kab izzynuotu latgalīšu volūdu, vierteibys i kulturu i vysi kūpā pīsadaleitu sacenseibuos tradiceju trasī.
