Grupa “Muosys” izdūd albumu “Ceļā”

Autors: Ausma Sprukte-Kozule - 12 decembris, 2022 🕙 Lasīšanas ilgums: 4 min.

13 jauni skaņdorbi i videoklips dzīsmei “Vysys dīnenis zynuoju” – taids ir rezultats tautys muzykys apvībeibys “Muosys” projektam, kas napaseņ eistynuots ar Vaļsts kuļturkapitala fonda i a/s “Latvijas valsts meži” Latgolys kuļturys programmys finansialu atbolstu. Jau dreiži dzīsmis byus klausomys ari taustomā CD formatā i platformā “Spotify” albumā “Ceļā”, gon ari 18. febralī grupa gaideis gostūs koncertā Lūznovys muižā. #LKP_2022

Etnomuzykys apvīneibu “Muosys” iz eisu šaļti nūkerom Rēzeknis piļsātys centrā Latgolys viestnīceibā GORS. Kasdīnā Liene, Marta i Laima ir vysaiduokūs dorbūs i laiku pavoda kotra ar sovu saimi, partū itei saruna vysom ir ari zeimeiga sasatikšona, kurā pasaprīcuot par kūpeigū – jau pavysam dreiži klauseituojim byus daīmams grupys jaunīs albums “Ceļā”.

Marta Igaune tautys muzykys apvīneibys “Muosys” puorstuove

Asom īrakstejušs 13 klausamus skaņdorbus i veļ mes esom īrakstejušs videoklipu. Mes esom cīši, cīši prīceigys par iznuokumu. Taipoš ari gimenis ir cīši prīceigys, maņ pošai ir puika, jis skotās i aplaudej i tod līkās, ka, jā, tys beja tuo vārts.

Jaunajā albumā ir stuosti par muosu dzeivi bierneibā, izteikts dobys vierteibu atainuojums, gon ari īkļautys instrumentalys melodejis. Tautys muzyka i kūpā spieļuošona jaunītem montuota nu vacuokim, ar kurim juos kūpā muzicej kai Igauņu saime.

Liene Brence tautys muzykys apvīneibys “Muosys” puorstuove

Mes vysu bierneibu vīnmār esom spieļuojušs i dzīduojušs, muziciejušs gon tradicionalā tautys muzykys vierzīnī, gon ari akademiskajā. Kaut kaidys ninansis varbyut ir nu baroka muzykys, nu skandinavu muzykys, bet pamats, prūtams, ir tys dziļums i dzymtys spāks.

Liene Brence tautys muzykys apvīneibys “Muosys” puorstuove

Jaunuokuo muosa atsagrīzēs tai kai piedejuo nu myusim trejom Latgolā i tys ari saturs diskā ir saisteits ar tū, ka mes kai muosys ejam vīna da ūtrys ceļā, ka atsagrīžom nu kaut kurīnis iz Latgolu, iz sātu, otkol esom ceļā, kaids myusim kotrai ir bejs dzeivis ceļš, ari ceļš saisteibā ar tū, kū mes kasdīnā dorom, ceļš saisteibā ar tū, kai ir saguojs atrast sovu dzeivis draugu, kas ir tys mīlesteibys ceļš.

Marta Igaune tautys muzykys apvīneibys “Muosys” puorstuove

Ceļš īauž sevī vairuokus taidus guojumus, kas ari ir diskā atspūguļuots. Dzeivis ceļš, tauteņuos īšonys ceļš, ceļš iz sātu.

Laima Maslova tautys muzykys apvīneibys “Muosys” puorstuove

Par preceibom, par kuozom, ir daudzi originaldorbi. Mes spieļojom latgalīšu tautysdzīsmis, latvīšu tautysdzīsmis, vacuokuos muosys Līnys originaldorbus.

Kotrai nu muosu grupā ir sovs uzdevums, bet, kai juos pošys izsver – lai ari roksturi juom atsaškir, vysys vīnoj humors, jūki, sirdsyltums i spieja gon dzīduot, gon spieļuot muzyku.

Laima Maslova tautys muzykys apvīneibys “Muosys” puorstuove

Es asmu pyutiejs, pyušu vys kaut kū, vairuok flautu taišni i ir ari blokflauta, i bīži viņ sytamī instrumenti munā puorzinī, i dažreiz ari pīdzīdu.

Marta Igaune tautys muzykys apvīneibys “Muosys” puorstuove

Es poša spieļoju… ir gobols, kurā spieļoju gitāru. Ir goboli, kurūs es asmu ari bundiznīks i puorsvorā maņ ir mandolīna, kū es spieļoju, ari dzīdu.

Liene Brence tautys muzykys apvīneibys “Muosys” puorstuove

Es vairuok spieļoju vijūli, ari dzīdu. Na tikai vijūli, prūtams, ir kūkle, var ari perkusiju voi mandolīnu, gitāru. Mes cīši mainomēs sovā storpā, lai tys byutu kruošni. Daudz ari tai kai mieginoju veiduot aranžejis i kūpā mes veidojam kaut kaidys originalkompozicejis.

Albuma “Ceļā” izdūšonai apvīneiba “Muosys” kūpā ar bīdreibu “Latgolys producentu grupa” īgiva 3000 eiro lelu atbolstu Latgolys kuļturys programmys 2022 projektu konkursā.

Marta Igaune tautys muzykys apvīneibys “Muosys” puorstuove

Tys, prūtams, ir cīši svareigi, ka tevi atbolsta, na tikai morali i emocionali, bet tūmār finansiali vyss tys moksoj. Gribīs īsaguļdeit, lai ari skateituojam ir interesanti. Tys finansialīs atbolsts tūmār ļūti paleidz atsaspertīs i daudzi kū ari caur itū projektu mes pošys esom īsavuiciejušs.

Laima Maslova tautys muzykys apvīneibys “Muosys” puorstuove

Mēs esam cīši prīceigys i aicynojam vysus iz 18. februari iz Lūznovys muižu, iz koncertu. Mēs prezentēsim sovu disku. Ļūti vysus meilai gaidom iz tū koncertu, lels nūtykums myusim.

Jau pavysam dreiži īsapazeit ar koncerta repertuaru sevkurs varēs nūsaklausūt albumu “Ceļā” gon taustamā CD formatā, gon ari platformā “Spotify”.

Dalies:

Runoj Latgola: 1. raidiejums par Latgolys kuļturys programmu 2022

Runoj Latgola: 2. raidiejums par Latgolys kuļturys programmu 2022

Līdzīgi raksti