Žurnala “A12” komanda roksta par viesturi, Dzīšmu svātkim i darbeigim cylvākim

Autors: Ausma Sprukte-Kozule - 7 decembris, 2022 🕙 Lasīšanas ilgums: 6 min.

Itymā godā vīneigīs žurnals, kas viestej taišņi par Latgolu, tuos aktualitatem i personeibom – “A12” – svietej desmit godu jubileji. Kai i sevkuram medijam ir cīši svareigi giut sova dorba nūviertiejumu gon nu laseituoju atsauksmem, gon finansiali. Tai ar Vaļsts kuļturkapitala fonda i a/s “Latvijas valsts meži” Latgolys kulturys programmys 2022 atbolstu žurnalā izveiduotys treis zeimeigys rubrikys par cylvāku i viesturisku nūtikšonu atspūguļuojumu īlu nūsaukumus, par gataveišonūs Vyspuorejīm Dzīšmu i deju svātkim, kai ari par aktivuokajīm cylvākim vysaiduokuos bīdreibuos i kūpīnuos, #LKP_2022

“Pa eistam. Par myusim.” – taids ir žurnala A12 golvonīs vadmotivs, ar kuru rokstu, fotografeju i muokslys dorbu autori aicynoj ceļuojumā pa Latgolu. Kab īsapazeitu tyvuok ar sovim laseituojim, informeitu, par kaidim tematim roksta, i īsaklauseitu padūmūs, žurnala redaktore ar kolegim regulari brauc gostūs i niu vīna nu ituo goda sasatikšonom nūtyka Preiļu Golvonajā bibliotekā.

Ināra Groce žurnala “A12” redaktore

Vīnmār cīši svareiga gon atgrīzeniskuo saite, gon ari tys, kū tev pasoka cylvāki, kū varbyut jī vālātūs veļ redzēt, kū jī grybātu lasēt. Preiļi, storp cytu, ir vīna nu tuom piļsātom, kurā vysvaira runoj latgalīšu volūdā. Tai vysmoz ir teikuši tī, kas ir pietiejušs piļsātu i rakstiejušs atteisteibys programmys.

Ivars Matisovs geografs, piļsāttvidis pietnīks, žurnala “A12” rokstu autors

Beja gona daudz vaicuojumu, varē just, ka cylvākim, kas beja atguojušs, ituos lītys interesej. Maņ ir ari prīks partū, ka tys ir taids darbeņš, kas saguodoj gondarejumu. Lai kaut kū suoktu raksteit vajag daudz par tū dūmuot, vuokt materialus. Tys process aizem pat ni mienesi, tys aizem bīžai viņ godus.

Leidz ar laseituoju interesi i atsauksmem cīši svareigi rokstu izveidei ir giut ari finansialu atbolstu. Itymā godā Latgolys kuļturys programma 2022 daškeira 3500 eiro projekta “Citādi latviskais žurnālā A12 – ceļš uz Latgali” eistynuošonai. Tuo gaitā žurnalā losamys treis jaunys rubrikys.

Ivars Matisovs geografs, piļsāttvidis pietnīks, žurnala “A12” rokstu autors

Četru rokstu cykls par Latgolys piļsātu, īlu nūsaukumim jeb tai saucamī urbanonīmi. Vairuok es tīši akcenteju tuos īlys, kuru nūsaukumi saisteiti ar kaut kaidim cylvākim, viesturiskom personom, kas ir cīši saisteitys ar Latgolu, ar piļsātom. Tī kas taidi interesantuoki, originaluoki, kas tīši atspūguļoj itū konkretū vītu.

Ināra Groce žurnala “A12” redaktore

Veļ vīna tēma, kurai mes pīsavērsemēs beja muzyka. Ar Latgolys gatavuošonūs Vyspuorejīm Dzīšmu i deju svātkim. Tys trešīs stuosts beja “Vydspus” latgalisks nūsaukums, kas nūzeimej gon tū, kas ir īkšā, gon tū, kas ir apleik. Tys, prūtams, beja par tīm uzjiemeigajim cylvākim, kuri kaut kū dora i snādz sovai kūpīnai dīzgon lelu atbolstu.

Laura Melne žurnala “A12” rokstu autore, portala lakuga.lv redaktore

Žurnalam “A12” es taišņi niu intervieju akteri Juoni Krūni i mes runuom par taidu napīcīšameibu īsasaisteit dažaiduos nūtikšonuos, pylsūniski byut aktivim. Maņ līkuos, ka ite saguo taida ari cīši īdvesmojūša saruna na tikai myusim, bet ari žurnala laseituojim.

Ināra Groce žurnala “A12” redaktore

Prūtams, ka ituos programmys atbolsts ir cīši byutisks, partū ka mes rodom rubrikys i programma atbolsta myusim gon autoratleidzeibys finansejumu, gon ari finansejumu myusu muokslinīkim, lai mes varētu vairuok izpieteit taišņi kaut kaidu konkretū tēmu. Partū, kas byutu juouzloboj Latgolys programmai… prūtams, tys, kū grybeitūs vairuok, tys ir finansiejums. Lai aizviņ vairuok ituos idejis varētu atbaļsteit.

Itys gods žurnalam “A12” ir dyžen zeimeigs ari partū, ka svieteita žurnala desmit godu jubileja. Turkluot leluoka daļa žurnalistu, muokslinīku, viesturnīku i cytu nūzaru specialistu žurnala redakcejī struodoj vysu itū laiku.

Ināra Groce žurnala “A12” redaktore

Myusim ir sasaglobuojs myusu pamatsastuovs, kas esmu es, redakotre Ināra Groce, cīšā sadarbeibā ar Ingu Čekšu-Ratnīci, Ilonu Rupaini, kas myusim atbiļd vairuok par muzykys jūmu. Pi myusim dorbojās ari Inga Žirgule, kura cīši labi puorzyna tradicionalū muokslu un ari Valentins Lukaševičs. Es nūteikti gribētu mineit ari Lauru Repeli, kas šūbreid atbiļd gon par tū, voi ir vārts apmekleit un īsapazeit ar izstuožu skatejumu, kai ari jei ir myusu žurnala korektore. Myusim ir jauna žurnāliste Laura Melne, par kū mes cīši prīcojamīs, jei roksta ari latgaliski, i Edīte Husare. Mes juos varētu nūsaukt par myusu latgalīšu volūdys ekspertim. Myusim ir fotografi na tikai Latgolā, bet ari Reigā.

Roksti, kai ari uzsver redaktore Ināra Groce, žurnalā ir gon latgalīšu, gon latvīšu volūdā. Ivara Matisova puorzinī i juo sirdej tyvuokuo tema ir par vysaiduokom viesturiskom līceibom piļsātys vidī.

Ivars Matisovs geografs, piļsāttvidis pietnīks, žurnala “A12” rokstu autors

Tei nav interveja, tei nav eseja, tys ir taids pietnīcisks apkūpuojums par kaut kaidu izvālātu temu. Tuos tēmys ir ļūti dažaidys, kas saisteitys gon ar Latgolys dobu, gon ar cylvāku, ar piļsātom, ar vītom, ar kinu, ar muzyku. Es rokstu tikai latviski, es asu mēginuojs šū tū rakstēt ari latgaliski, bet muna dzymtuo ir latvīšu volūda.

Ināra Groce žurnala “A12” redaktore

Mes vālāmīs stuostēt pa eistam, par myusim, par Latgolys regionu, par cylvākim, kas ite dzeivoj, par nūtykumim, analizēt, īdvesmuot i vīnlaiceigi byut ari kaut kaida laikmeta ruodeituoji.

Žurnala “A12” rodūšuo komanda, gon ari citi Latgolys mediji aicynoj drūšai stuosteit i īteikt idejis rokstim, sižetim i raidiejumim par regiona nūtikšonom, cylvākim i interesantim faktim, partūka niulejā tehnologeju laikmetā na vysam var izsekuot leidza i cīši paleidz sevkurs īsacejums i aicynuojums.

Dalies:

LKM atjaunoj daļu nu Pujātu keramikys kolekcejis duovynuojuma

Runoj Latgola: 1. raidiejums par Latgolys kuļturys programmu 2022

Līdzīgi raksti